by

Эрхэм харилцагч, даатгуулагч таны энэ өдрийн амгаланг айлтгая.

Бидэнд итгэл хүлээлгэн, эрсдэлээ даатгуулж, хамтран ажилласан та бүхэндээ 2017 оны ажлын үр дүнгээ тайлагнаж байгаад баяртай байна.

Бидний хувьд 2017 онд төлөвлөсөн зорилтууддаа хүрч, даатгалын салбарт эзлэх компанийн байр суурийг улам бэхжүүлэн, 100 гаруй ажиллагсадтай, 238 даатгалын төлөөлөгчтэй Монгол улсын бүхий л аймаг, сумдад хүрч ажилласан баг хамт олныг бүрдүүлж чадлаа. 2017 онд манай компани нийт 10.3 тэрбум төгрөгийн хураамжийн орлогыг төвлөрүүлж, өнгөрсөн оны эцсийн үр дүнгээс 44.4 хувийн өсөлт үзүүлж, харилцагчиддаа 4.0 тэрбум төгрөгийн нөхөн төлбөр олгож ажилласан байна.
2017 онд компани маань 1.1 тэрбум төгрөгийн цэвэр ашигтай ажилласан бөгөөд өөрийн хөрөнгийн өгөөж 23.7 хувьтай байна.

Өнгөрсөн жил бид үйлчилгээний чанарт онцгой анхаарч, харилцагчдаа сэтгэл ханамжтай байлгахыг хичээн ажилласан. Нөхөн төлбөрийг энгийн үед дунджаар ажлын 3 хоногт багтаан шийдвэрлэж байгаа бөгөөд шинэ жил, цагаан сарын баяр ёслолын үеэр 500 мянга хүртэлх дүнтэй нөхөн төлбөрийг өдөрт нь шийдэж, шуурхай үйлчилж, харилцагчдын талархлыг хүлээлээ.

Бид харилцагчиддаа шинээр газар тариалангийн даатгалын бүтээгдэхүүнийг санал болгож, чамгүй борлуулалт хийлээ. Ургац алдсан аж ахуйн нэгжүүдэд Хөдөө Аж Ахуйн Давхар Даатгал компанитай хамтран 211 сая төгрөгийн нөхөн төлбөрийг олгосон. Мөн тээврийн хэрэгслийн даатгалын бүтээгдэхүүнийг хялбаршуулан, хүртээмжтэй болгох үүднээс оны эцсээр Хүлэг нэртэй бүтээгдэхүүнийг харилцагчиддаа санал болгож эхэллээ.

Ард Даатгал 2017 онд татварт нийтдээ 316 гаруй сая төгрөг, нийгмийн даатгалд 245 сая төгрөгийг төлж, улс эх орон, ажиллагсдынхаа өмнө хүлээсэн үүргээ өндөрт өргөн ажиллалаа.

2018 онд бид компаниа Монголын Хөрөнгийн Бирж дээр гаргаж, нээлттэй хувьцаат компани болгох, хувьцаагаа олон нийтэд нээлттэй арилжаалах ажлыг төлөвлөөд, урам зоригтойгоор ханцуй шамлан орлоо. Та эрсдэлээ бидэнд даатган, манай компаниар үйлчлүүлэхийн зэрэгцээ бидний төлөвлөсөн хувьцаа гаргах ажилд оролцож, даатгалын салбарын тоглогч болохыг уриалж байна. Монгол улсад даатгалын салбар улам өсөн өргөжих боломж дүүрэн байгаа гэдэгт эргэлзэхгүй байна.

 

Гүйцэтгэх захирал Г.Цогбадрах

Copyright © 2017 Ard Daatgal